О библиотеке

Биһиги оскуолабыт библиотеката илин эҥэргэ аан бастакы гимназия аһыллыбытыгар 1992 сыллаахха тэриллибитэ. Оччолорго библиотекарынан үрдүк таһымнаахтык нуучча тылын учуутала Мончурина Оксана Софроновна үлэлээбитэ. Ол кэмҥэ библиотека улахан оскуола дьэтигэр, биир хоско батар, эбии кыра хранилищелаах этэ.

Онтон саҕалаан биһиги библиотекабытыгар араас сылларга үрдүк таһымнаахтык Татаринова Аксинья Петровна, Данилова Саргылана Анатольевна, Доргуева Валентина Гаврильевна уонна Мочкина Оксана Николаевна үлэлээбиттэрэ.

Библиотекаҕа араас мероприятиелар ыытыллаллара. Оҕону кинигэ алыптаах дойдутугар угуйарга араас викториналар, библиотечнай уруоктар, кинигэ быыстапкалара оҥоһуллаллара.

2005 сыллаахха библиотеканы саҥа олох ирдэбилигэр сөп түбэһиннэрэн   медиатекаҕа кубулутар проект оҥоһуллан саҥа киэҥ дьиэлэммитэ. Проект олоххо киириитигэр улахан көмөнү оччотооҕу оскуола дириэктэрэ Миронова Аиза Николаевна оҥорбута. Медиатека сүрүн соруга диэн информация араас көрүҥүн ааҕааччыга тиэрдии. Кумааҕы докумуонуттан саҕалаан  электроннай диискэҕэ, интернет ситимигэр тиийэ — барытын туһаныахтарын сөп.

Билигин улахан болҕомто учууталы кытта биир ситимҥэ үлэлииргэ ууруллар. Ол курдук араас литературнай уруоктар бэриллэллэр: ”Любимый сказочник“, ”Всадник, скачущий впереди“, ”Для зверей приятель я хороший“ уо.д.а. Ону таһынан библиотечнай уруок эмиэ ытыллар: ”Структура книги“, ”Справочная литература“, ”Оформление рефератов“. Оҕо бэйэтин идэтин сөпкө талынарыгар көмө эмиэ оҥоһуллар: ”В мире профессий“, ”Все профессии важны“, ”Выбор профессии“.

Билигин библиотекабыт фондата хаҥаан уопсайа 23593 экз. Онтон учебнига – 16058 экз., пособията – 4078 экз., ааҕар киниигэтин ахсаана – 3001экз., ону таһынан электроннай диискэлэр бааллар. Киэн туттарбыт диэн, өр сылларга мунньуллан, араас темаҕа аналлаах элбэх ыйынньык кинигэлэннибит.

Ааҕааччылар араас викториналарга, куонкурстарга көхтөөхтүк кытталлар. Сылын аайы ыытыллар улуустааҕы ББЗ күрэҕэр оҕолор ситиһиилээхтик кыттан 2011с. – 1 миэстэни, 2012с. – 2 миэстэни ылбыттара. 2011 сыллаахха УУО ыыппыт оскуолалар библиотекаларын күрэҕэр ”Лучшая школьная инновационная библиотека“ диэн ааты ылан бастаабыппыт. Кэлэр да сылларга бу таһымы ыһыктыбакка, олоҕу кытта тэҥҥэ хардыылаан, библиотекабыт үүнэ-сайда туруоҕа диэн бигэ эрэллээхпит.